ഹാജിയുടെ പോരാട്ടമാണ്
തൊട്ടു വിളിക്കുന്ന കാഴ്ചകളെയും
തളച്ചിടുന്ന മോഹങ്ങളെയും
തട്ടിത്തകര്‍ക്കുന്ന പോരാട്ടം ...........
നമ്രൂദിന്റെ അധികാര മുഷ്ക്കും
നാട്ടു ദൈവങ്ങളുടെ പൈതൃകപ്പെരുമയും
നാശത്തിന്റെ നാള്‍ വഴികളെന്നു ചൊല്ലി
നാട് വിട്ടിറങ്ങി ദേശങ്ങള്‍ താണ്ടിയെത്തിയ
നബി-ഇബ്രാഹീമാണ് അവരുടെ പടനായകന്‍
അഹന്തയുടെ ആടയാഭരണങ്ങള്‍
അകലങ്ങളില്‍ ഊരിയെറിഞ്ഞ്
അലിവിന്റെ വെള്ള യുടുത്ത്
അനുസരണത്തിന്റെ വെള്ള പുതച്ച്
അനുഭൂതിയുടെ ലോകം തേടി
അവന്‍-ഹാജി- പോരാടുകയാണ്....
സ്വാര്‍ത്ഥ മോഹങ്ങളേ പടിയടച്ചോടിച്ച്
സ്വസ്ഥ സ്വര്‍ഗങ്ങളെ മനസ്സില്‍ തളിര്‍പ്പിച്ച്
സ്വഫാ-മര്‍വയില്‍ പാദം പതിപ്പിച്ച്
സ്വപ്‌നങ്ങള്‍ പൂക്കുന്ന താഴ്വര മോഹിച്ച്
സ്വന്തത്തെ ബലി നല്‍കുന്ന പോരാട്ടമാണത്
ദേശങ്ങളുടെ അതിരുകള്‍ ഭേദിച്ച്
ദേശാടനത്തിന്റെ മേന്മകള്‍ വിരിയിച്ച്
ദാഹമകറ്റിയ നാഥനെ ധ്യാനിച്ച്‌
ദയാവായ്പിന്റെ ഉമ്മ-'ഹാജറ'യെ അറിയിച്ച്
ദിഗന്തങ്ങള്‍ മുഴങ്ങുന്ന കീര്‍ത്തന മുച്ചരിച്ച്
ദശാബ്ദങ്ങളുടെ ചരിത്രം പഠിപ്പിച്ച്
ദേഹേഛ ക്കെതിരിലുള്ള പോരാട്ടമാണത്
പിശാചിന്റെ പിന്‍ വിളികളെ -
പതറാതെ കല്ലെറിഞ്ഞോടിക്കാന്‍ ...........
പ്രലോഭനങ്ങളുടെ അധികാര ഹുങ്കിനെ -
പുല്‍കാതെ തട്ടിത്തെറിപ്പിക്കാന്‍.........
പാപത്തിന്‍ പാതാള നരകങ്ങളെ -
പുണ്യങ്ങളുടെ പാല്‍കടലില്‍ തണുപ്പിക്കാന്‍ .......
പിറന്ന പൈതലിന്‍ പരിശുദ്ധി നേടുവാന്‍ ......
പോരാളിക്ക് പ്രാപ്തി നല്‍കുന്ന -
പകരമില്ലാത്ത പോരാട്ടമാണ് ഹജ്ജ് ..........
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ