2013, ഓഗസ്റ്റ് 8, വ്യാഴാഴ്‌ച

പെരുന്നാള്‍ കനല്‍ .....



പെരുന്നാള്‍ കനല്‍
-----------------------------
പെരുന്നാള്‍ പുലര്‍ച്ചയില്‍
ഉമ്മയൊരുക്കിയ ബിരിയാണി
പ്രവാസത്തിന്റെ വര്‍ഷം
പതിനെട്ടു പിന്നിട്ടിട്ടും
മനസ്സിലിപ്പോഴും
മണമൊടുങ്ങാതെ
ബാക്കിയുണ്ട്.....

വഴിതെറ്റാതെ തേടിവരുന്ന
എല്ലാ പെരുന്നാള്‍ രാവിലും
ഉമ്മയുടെ ബിരിയാണി ചെമ്പ്
ഖല്‍ബില്‍ തീ കൂട്ടും
നെഞ്ചിനു മുകളില്‍
കനവുകള്‍ കനല്‍ നിരത്തി
'ദമ്മി'ട്ട് അമര്ത്തി വെക്കും

വേവും തോറും
കണ്ണുകള്‍ തിളച്ചു മറിയും
കനലുകള്‍ കത്തി തിളങ്ങും
ഒടുവില്‍
വെന്തൂ ന്ന് അറിയിച്ച്
ഉള്ളിലമര്‍ത്തിയ  തേങ്ങല്‍
ഒരു വിസിലായി പുറത്തു വരും

ഓര്‍മ്മകള്‍ നുണഞ്ഞ്
'ദമ്മ്' പൊട്ടിക്കുമ്പോള്‍
ഒഴിഞ്ഞ വയറിനെ
നനഞ്ഞ കണ്ണുകള്‍ കുളിപ്പിച്ചിരിക്കും
കരിഞ്ഞ കനലുകള്‍ പോലെ
കാത്തു വെച്ച ഓർമ്മകള്‍
അടുത്ത പെരുന്നാളിന്റെ
തിയതി തിരയും